तुलसीपुर
७ कार्तिक/ तुलसीपुर उपमहानगरपालिका वडा न ११ मा सञ्चालित वडाध्यक्ष कप फुटवल प्रतियोगिताको उपाधी बेलटाकुरा ‘ए’ ले चुमेको छ । उस्ले नगद ४० हजार सगैं कप, मेडल प्रमाणपत्र समेत हात पारेको छ । फाइनलमा बबई लेजेण्ड ‘ए’ उरहरीलाई १-० गोल अन्तरले हराउदै बेलटाकुराले उपाधी जितेको हो । दर्शकले भरीभराउ अमर मावि उरहरीको खेल मैदानमा खेल सुरु भएको केहि मिनेटमै बेलटाकुराका शरद बुढाथोकीले गरेको गोल नै निर्णायक बन्यो ।
खेलको दोस्रो हाफमा बबईले केहि अवसर पाएतापनि खेलमा फर्किन सकेको थिएन । उस्ले उपविजेतामा चित्त बुझाउदै नगद २५ हजार सगैं कप, मेडल प्रमाणपत्र हात पारेको थियो । फाईनल खेलमा गोल गर्न सफल बेलटाकुराका शरद बुढाथोकी २ हजार ५ सय र गोलरक्षक अरुण हमाल १ हजार रुपैया सहित पुरस्कृत भएका थिए ।
प्रतियोगितामा उत्कृष्ट खेलाडीका रुपमा बेलटाकुराका सञ्जीत मल्ल र उत्कृष्ट गोल रक्षकका रुपमा बबई लेजेण्डका प्रविण न्यौपाने घोषित भएका थिए । उनीहरुले ट्रफी प्राप्त गरेका थिए । प्रतियोगिताभर एम्पायरको भुमिका मनराज बुढा,सुगम चौधरी र प्रकाश बुढाले निभाएका थिए ।
वडाध्यक्ष मान बहादुर रावतको अध्यक्षता तथा लुम्बिनी प्रदेशका सांसद रेखा शर्माको प्रमुख आतिथ्यमा पुरस्कार वितरण गरिएको थियो । स्थानिय स्तरमा फुटबल खेलको बिकास र बिस्तार गर्न कार्तिक ४ गतेदेखि सुरु भएको प्रतियोगितामा ११ टिमको सहभागिता रहेको थियो ।
