काठमाडौं
१८-कार्तिक/ सर्वोच्च अदालतले अन्तरिम आदेशमार्फत राजदूत फिर्ता निर्णय कार्यान्वयन नगर्न सरकारलाई निर्देशन दिए पनि सरकारले ती राजदूतहरूलाई नेपाल फर्कन पत्र पठाएको छ।
परराष्ट्र मन्त्रालयले फिर्ता बोलाइएका राजदूतहरूलाई यही कात्तिक २० गते बिहीवारभित्र मन्त्रालयको सम्पर्कमा आइपुग्न निर्देशन दिएको छ। मन्त्रालयका सहसचिव सुरेन्द्रकुमार यादवद्वारा पठाइएको पत्रमा “अर्को व्यवस्था नभएसम्म परराष्ट्र मन्त्रालयमा हाजिर हुन” भनिएको छ।
गत आइतबार सर्वोच्च अदालतले अन्तरिम सरकारको निर्णय कार्यान्वयनमा रोक लगाउँदै अन्तरिम आदेश जारी गरेको थियो। तर, त्यसको विपरीत हिजो प्रधानमन्त्री तथा परराष्ट्रमन्त्रीस्तरीय निर्णयमार्फत राजदूतहरूलाई नेपाल फर्कन पत्राचार गरिएको हो।
मन्त्रिपरिषद्को असोज ३० गतेको बैठकले चीन, जर्मनी, मलेसिया, इजरायल, कतार, रुस, साउदी अरब, स्पेन, बेलायत, अमेरिका र जापानका लागि नियुक्त नेपाली आवासीय राजदूतहरूलाई फिर्ता बोलाउने निर्णय गरेको थियो।
