काठमाडौँ
१३ मंसिर/ काठमाडौँमा जारी दोस्रो संस्करणको नेपाल प्रिमियर लिग (एनपीएल) क्रिकेट अन्तर्गत आज पनि दुई रोचक खेल हुँदै छन्।
त्रिभुवन अन्तर्राष्ट्रिय क्रिकेट रंगशालामा पहिलो खेल बिहान ११:४५ बजे लुम्बिनी लायन्स र पोखरा एभेन्जर्सबीच हुनेछ। रोहित पौडेलको कप्तानीमा रहेको लुम्बिनीले चारमध्ये एक खेल मात्र जितेको छ भने कुशल भुर्तेल नेतृत्वको पोखराले पनि तीन खेलमध्ये एकमा मात्रै जीत हात पारेको छ। अंक तालिकामा लुम्बिनी सातौँ र पोखरा छैटौँ स्थानमा छन्। प्लेअफ सम्भावना जोगाइराख्न दुवै टोलीका लागि आजको खेल जित्नै पर्ने दबाब छ।
दिउँसो ४ बजे हुने दोस्रो खेलमा साविक विजेता जनकपुर बोल्ट्स र उपविजेता सुदूरपश्चिम रोयल्स आमनेसामने हुनेछन्। लगातार तीन खेलमा पराजित हुँदै कुनै अंक बटुल्न नसकेको जनकपुरका लागि आजको खेल ‘डू–अोर–डाइ’ बनिएको छ। आज पनि पराजित भए जनकपुर प्लेअफ दौडबाट बाहिरिनेछ।
उता अपराजित सुदूरपश्चिमले भने लगातार चार खेल जितेर अंक तालिकाको शीर्ष स्थान सुरक्षित गरिसकेको छ। आजको खेल जित्दै सुदूरपश्चिमले प्लेअफमा स्थान पक्का गर्ने र गत संस्करणको फाइनलमा जनकपुरसँग व्यहोरेको पराजयको बदलासमेत लिने लक्ष्य राखेको छ।
दुवै टोलीको अवस्थाले आजको खेल निकै प्रतिस्पर्धात्मक तथा रोमाञ्चक हुने अपेक्षा गरिएको छ।
